3將於明年 4 月啟播、由電盈擁有的免費電視台 ViuTV,今日率先帶來《Viu》手機程式,並於 App Store 及 Play Store 正式上架,讓用家可以於流動裝置上免費煲劇。只要用電郵註冊或以 Facebook 登入,就可以藉《Viu》免費觀看日劇、韓劇,不過「免費午餐」當然要睇廣告吧!想知《Viu》值唔值得裝?等我呢個日劇痴 ezone.hk 女版主,同各位讀者慢慢研究!
【《VIU》iOS 下載位置】
【《VIU》Android 下載位置】
1. 獨家追播最新劇集
Viu 獨家追播嘅劇集有中、台、日、韓劇集、韓國綜藝同日本動畫。Viu 話首播後最快 8 小時就會附上中文字幕上傳,完全緊貼首播地區。現時獨家追播中嘅有14 套韓劇同綜藝、3 部日劇、5 部動畫同 2 齣台劇。雖然暫時唔肯定係唔係 8 個鐘就有,但上星期播放嘅最新一集都已經有得睇,以香港電視台嚟講都算快手。
2. 只得一節廣告
Viu App 裡面每段影片開始前有大約半分鐘嘅廣告,之後就唔會插入任何廣告,亦唔會好似 myTV 咁分開一節節要再 load。讓觀眾可以一次過睇完一集,唔受廣告打擾。Viu 嘅 App 亦會記住你上次睇到邊度,下次打開同一條片時,觀眾就可以選擇接住睇落去定係由頭開始睇。雖然開頭段廣告比較長,又冇得飛,不過之後能夠一口氣睇完一集實在抵讚,呢樣可以話係小記最鍾意呢個 App 嘅一點啊!
3. 煲劇百科
進入全熒幕模式時,若呢集節目有煲劇百科,時間軸上就會有藍色 highlight 部分,上方會顯示一個對話框,讓觀眾知道有咩補充資訊。觀眾若對資訊有興趣就可以輕按對話框,屏幕右上角會出現詳細資訊,而影片仍會繼續播放。雖然小記覺得個「老是常出現」嘅藍色框有少少阻定,不過這些資訊有冇用就見仁見智啦,有些文化知識都算有用嘅。
4. 囊括日韓台劇集
Viu App 上面嘅節目類型都幾多元化,韓劇、韓國綜藝、日劇、日本動畫同中台劇都有,亦有自家製節目。除了緊貼日韓台首播嘅劇集外,亦有唔少已經完結嘅人氣劇集。Viu 嘅外購劇集裡面偶像劇比較多,相信目標觀眾比較年輕。唔知係唔係見近年韓流盛行,Viu App 上有大量韓劇同韓國綜藝,而日劇、動畫嘅選擇就比較少,相信 Viu 嘅目標觀眾係一眾韓粉。因此呢個 App 對鍾意睇日劇嘅小記嚟講就唔太吸引喇。
5. 自家製節目攻略韓粉
ViuTV 點講都係一個電視台,因此 Viu 嘅 App 入面唔止有外購劇集同節目,亦有自家製嘅節目俾觀眾收睇。Viu 嘅自家製節目放在類型韓劇攻略下,現時有 4 個節目,會教觀眾韓國文化同煲韓劇學韓文,ViuTV 亦有駐韓採訪隊報導同韓星、韓劇有關嘅最新消息。相信 ViuTV 係用 Viu App 嚟試水溫,明顯睇得出 ViuTV 係打算以韓流為主打入電視市場啊。
6. 記得睇住數據流量
最後提提大家,同其他睇片 App 一樣,用 Viu App 睇片需要好多流動數據,所以出街睇片嘅時候就要小心數據流量啊。不過 Viu App 比其他播片 App 好嘅係有下載功能,能夠讓用家下載完影片先出街收看,咁就唔駛擔心唔覺意用爆流量喇!
轉載至: ezone.hk